تعلم الشراء من الانترنت في ليبيا عن طريق ارامكس ليبيا

يحتوي هذا الموضوع على:

حـصـري:شرح طريقة الشراء من الانترنت وفتح حساب ارامكس وشراء فيزا كارت

--------------------------------------------------------------------------------

السلام عليكم ورحمة الله وبركاته

انا هنا لست بوضع دعاية او إشتراك في موقع وإنما سأعطي طريقة الشراء القانونية كيف تتم عن طريق الانترنت

أول شيء يجب ان يكون عندك فيزا كارت انترنت

كيف تكون عندك فيزا كارت انترنت

1-يكون عندك 93 دينار في جيبك

2-تاخذ جواز السفر متاعك وتصور منه صورة للصفحة العربية والانجليزية ويكون الجواز نفسه معاك

3-يكون عندك صورة شخصية

4-تمشي لمصرف الامان الموجود في حي الاندلس بجانب سوق حي الاندلس القديم مقابل محلات اللي يبيعو في الستلايت

والديجيتال ونصيحة مني خودوها من مصرف الأمان اللي في حي الاندلس

نفترضو انك مشيت لمصرف الأمان خش الداخل للاستعلامات قول له بالله يا خوي وين يديرو في الفيزا

يقول لك اركب للدور الثاني بعد تركب تلقا الموضفة قول لها عفوا انا نبي فيزا كارت أنترنت ركزو أنترنت

مش محليه لأن فيه نوعين من الفيزا الانترنت و المحلية ,,,::: الانترنت تقدر تشري بيها من الانترنت ومن أي موقع,,,

والمحلية ما تسحبش الا من ليبيا فقط نرجعو لموضوعنا بعد تقول لها نبي فيزا انترنت تقول لك لو سمحت هات المبلغ

تعلم الشراء من الانترنت في ليبيا عن طريق ارامكس ليبيا

وصورة من الجواز متاعك العربية والانجليزية والجواز الاصلي والصورة وحدير لك فيزا كارت وتبدا الفيزا تشتغل بعد 24 ساعة

عندي ملاحضة وهي أن الفيزا يكون الاسم فيها بالانجليزي ويجب أن تكون نفس الاسم المكتوب في الجواز

لاكن مرات الموضفة تغلط ودير لك لقطه يجب ان تنبهها من الاول تقول لها ديري الاسم نفس ما موجود في الجواز ّّّ

كيف يكون الغلط ؟ نعطو مثال

مثلا انت في الجواز اسمك mohamed algayed

تمشي هي تكتبه لك mohamed al-gayed
هاذي الغلطة كبيرة وتفسد عليك هلبا لذلك ركزو فيها من الاول

باه توا نجو للخطوة الثانية

كيف تفتح حساب في اراماكس

قبل كل شي شن هي اراماكس

اراماكس هي شركة شحن و توصيل موثوقة وغير غشاشة لها فروع كثيرة في العالم

كيف جت وشن إدير

لما مثلا انت تشري من موقع امريكي او بريطاني حاجة وتبيهم يوصلوها لك للحوش طبعا صعب

يوصلوها لك لانك مش في أمريكا او في بريطانيا شركة اراماكس حلت المشكلة عندها مكان في امريكا

وداراته للناس اللي تبي تشري عن طريق النت وتبي توصلها حاجة لما تمشي تشترك انت في اراماكس

كأنك فتحت صندوق بريد دائم ثابت بإسمك في أمريكا او في بريطانيا

بعد ان عطيت معلومة على الشركة نجي توا لطريقه فتح حساب في اراماكس

تمشي لمقر الشركة في غرغور ترفع معاك صورة من جواز السفر الورقة العربية والانجليزية و45 دينار

رسوم فتح الخدمة يعطوك العنوان ورقم العنوان وقتي وتروح تعيش حياتك

خلاص توا بعد بدت عندنا فيزا كارت وبدا عندنا صندوق بريد اراماكس في امريكا وبريطانيا ندخل

على واحد من المواقع الامريكيه ومن اشهرها امازون و إي باي تشوف شن تبي تشري تشري منهم

وتخلصهم وتعطيهم العنوان متاعك في اراماكس الموجود بالخارج وأراماكس كل يوم بتعمل تشك

على الحسابات لو لقت في حسابك فيه حاجه شاريها بيجيبوها لعندك لاحد الحوش

مثلا لو انت شريت لابتوب شوف اللاب توب هنا ب 1000 مواصفاته قويه لو تفتح موقع إي باي وتشوف

الاسعار تقعد تضحك لاب توب ب 80 دولار لاب توب ب 150 دولار وحاجات قوية لما ب تشريه

يقولو لك خلصه ووين تبينا نوصلوهولك تخلصه عن طريق الفيزا وتكتب لهم العنوان اللي لما فتحت حساب

اراماكس عطوهولك هما يوصلوه لحسابك على اراماكس في امريكا واراماكس بتجيبه الى ليبيا وبيجيبوه لعند حوشك

ب 20 دينار اول نص كيلو وكل نص كيلو فوقه ب 10 جني يعني للتبسيط اول كيلو ب 30 جني وكل كيلو زيادة

فوقه ب 20 جني ولو شحنتك فاتت 10 كيلو عندك 30% في المية تخفيض

تــــنـــــــبـــــــيـــــــه

طبعا إحذر ان تشري الخمور بجميع انواعها لانك حتتعرض للحبس الاسلحة المواد الكيماوية

لانك حتتعرض للمساءلة والحبس وأ اي شي مشبوه او غير قانوني رد بالك المهم

موقع إيباي

موقع امازون

وطبعا رد بالك على الفيزا متاعك رد بالك يخدعوك ودير بالك من النصابين والغشاشة ما تشريش

من مكان لن تتأكد من مصداقيته وما تخشش في صفقات ربح .,.,.

الفيزا ما تعبيش فيها فلوس إلا لما تبي تشري ما تخليش فيها مبالغ كبيرة

هلبا حت لو تعرضت للسرقه ما تكونش كمية الفلوس كبيرة